Ögmundur, hvers vegna?

Ég sat á þingpöllum í dag og hlustaði á þig flytja ræðuna þína. Ég skildi hvert orð sem þú sagðir, en ég skildi þig ekki. Þú fékkst málefnaleg andsvör frá þremur þingmönnum og ég vonaði að svörin þín myndu gera mér kleift að skilja þig. En því miður, þegar ég stóð upp og fór út þá var ég engu nær: Ég skil ekki hvað þú átt við með lýðræði.

Mér heyrðist á þér að þér væri svo mikið í mun að virða lýðræði að þú getur ekki fallist á lýðræðislegar kosningar til að fá úr því skorið hver er vilji lýðsins til umsóknar um aðild að Evrópusambandinu.

Þú sagðir ítrekað að þjóðin vilji aðildarviðræður við Evrópusambandið.

--------------------

Heimssýn lét gera skoðanakönnun dagana 28. maí til 4. júní sl. Spurt var:

"Hversu miklu eða litlu máli finnst þér skipta að fram fari þjóðaratkvæðagreiðsla um hvort Ísland eigi að sækja um aðild að Evrópusambandinu?"

Rúm 60% sögðu að það skipti mjög miklu máli að fram fari þjóðaratkvæðagreiðsla. 76,3% sögðu að það skipti mjög miklu eða frekar miklu máli.

Varstu nokkuð að vísa í þessa skoðanakönnun Heimssýnar máli þínu til stuðnings?

Ég bið þig að taka eftir að spurning Heimssýnar bauð ekki upp á feluleik um hvað aðildarviðræður eru. Í spurningunni kom sannleikurinn fram að aðildarviðræður þýða umsókn um aðild.

-----------------------

Í annarri könnun sem einnig var gerð fyrir Heimssýn var spurt:

"Hversu mikla eða litla áherslu finnst þér að ný ríkisstjórn eigi að leggja á að hefja aðildarviðræður við Evrópusambandið?"

Könnunin var netkönnun og gerð dagana 20. til 27. maí sl. Spurningin er þannig orðuð að látið er að því liggja að hægt sé að hefja aðildarviðræður án þess að sækja um aðild.

Spurningunni sem fól í sér þá blekkingu að hægt sé að hefja aðildarviðræður án umsóknar um aðild, svaraði 41,9% að æskilegt væri að hefja aðildarviðræður við ESB og 44,3% voru á öndverðri skoðun. Í könnuninni kom einnig fram að 95% telja aðkallandi að leysa fjárhagsvanda heimila og fyrirtækja.

Þegar þú sagðir í dag að það væri vilji þjóðarinnar að fá úr því skorið í aðildarviðræðum hvað væri í boði, í hvaða kannanir varstu þá að vísa?

------------------

Ég get ekki skilið hvað lýðræði hefur með það að gera að þér finnst að þú sem þingmaður geti neitað að færa þjóðinni það tækifæri að fá að kveða upp úr um það í þjóðaratkvæðagreiðslu hvort meirihluti þjóðarinnar vilji fara með fé og tíma í viðræður við Evrópusambandið. Það er ég viss um, Ögmundur, að þú gerir þér mjög vel grein fyrir því að það fé sem notað verður í aðildarviðræður verður tekið af einhverju. Hverju? Hvaðan verður féð tekið? Hvaða verkefni verða lögð niður eða ýtt til hliðar til að skrapa saman í aðildarviðræður?

Það þarf ekki mig til að segja þér að sami þúsund kallinn verður ekki notaður til að borga Bretum vegna Icesave, Hollendingum vegna Icesave, vexti af himinháum lánum, aðildarviðræður við Evrópusambandið (bæði í krónum og erlendum gjaldeyri), til að halda uppi heilbrigðisþjónustu, til að halda uppi menntakerfinu, til að borga atvinnuleysisbætur, til að skapa störf, til að borga kostnað við Alþingi!

Hvernig geturðu komist að þeirri niðurstöðu að það sé virðing við lýðræðið að neita þjóðinni um að fá að greiða því atkvæði hvort hún vilji ráðstafa þeim fáu krónum sem hún á til að ræða við Evrópusambandið?

Þingmenn hafa sagt mér að niðurskurðurinn á næsta ári verði skelfilegur, "blóðugur", segja sumir. Hvernig ætlar þú sem þingmaður að réttlæta það að ráðstafa einum milljarði, tveimur milljörðum, jafnvel hærri upphæð í aðildarviðræður þegar við blasir að í lok þessa árs byrja innviðir samfélagsins að bogna vegna niðurskurðar sem á engan sinn líkan og enginn veit hvað hann varir lengi og fólk getur sennilega ekki fyllilega gert sér í hugarlund hverjar afleiðingarnar af þeim niðurskurði verða og hve lengi það mun taka að byggja innviðina á ný?

Það er með vilja gert að ég rifja ekki hér upp kosningaloforð Vinstri grænna. Þau þekkir þú betur en ég.

Helga Garðarsdóttir

 

Athugasemdir

[Benedikt Gunnar Ófeigsson, 16.7.2009 kl. 01:29]

Ég hlustaði á ræðu Ögmundar. Ég hef aldrey séð þann ágæta mann Ögmund Jónason á öðru eins undanhaldi. Ég vænti þess að Ögmundur svari þessum spurningum þínum skýrar en hann gerði í þingsal.

[Steingrímur Helgason, 17.7.2009 kl. 00:33]

Væntíngar til Ömma verða því miður alltaf undir pari...