Forsætisráðherrann og fjármálaráðherrann hugsi sinn gang!

Forsætisráðherrann hefur ekki yrt á íslensku þjóðina síðan hún tók við starfi þann 1. febrúar.

Fjármálaráðherrann hefur tamið sér að tala niður til almennings og sérfræðinga sem eru ósammála honum. Hann hefur ítrekað misboðið réttlætiskennd fólks með því að neita að taka tillit til skoðana sem standa í vegi fyrir Icesave-nauðungarsamningunum hans.

Þau ætluðu bæði að láta þingmenn samþykkja ríkisábyrgð á Icesave-nauðungarsamningunum án þess að þingmenn fengju að sjá þá.

Sl. nótt sameinaðist meirihluti fjárlaganefndar um fyrirvara við samþykkt vegna ríkisábyrgðar á nauðungarsamningunum. Ekkert hefur enn heyrst um faglegar umsagnir um þá fyrirvara - en stjórnmálamenn hafa látið ljós sitt skína.

Eitt er öruggt! Jóhanna og Steingrímur voru rekin til baka með samningana sem þau voru ákveðin í að troða ofan í kokið á þjóð og þingi. Ættu þau ekki bæði að hugsa sinn gang og leita sér að nýju starfi?

Helga Garðarsdóttir