Að vilja ekki lána án skilyrða eða að vilja ekki fá óskilyrt lán!

Frá því í haust hafa Íslendingar fengið misvísandi skilaboð um skilyrði ríkisstjórna norrænu landanna fyrir láni til þeirra.

Vildu norrænu ríkisstjórnirnar upphaflega ekki lána vegna þess að þær treystu ekki gegnspilltum stjórnmálamönnum á Íslandi?

Eru norrænu lánin háð skilyrðum Alþjóðagjaldeyrissjóðins?

Er lán Alþjóðagjaldeyrissjóðsins háð norrænu lánunum?

Eru norrænu lánin háð því að Íslendingar láti beygja sig vegna Icesave?

Í dag hafa fréttamiðlar eftir Kristin Halvorsen, fjármálaráðherra Noregs, að lánið frá norska þinginu sé háð því að gengið hafi verið frá Icesave.

Þessi yfirlýsing norska fjármálaráðherrans kemur á of sérkennilegum tíma til að hægt sé að láta eins og maður sjái ekki samhengið: Nú er ögurstund í Icesave-nauðungarmálinu og það er allsérkennilegt að norski fjármálaráðherrann hafi upp úr þurru fundist nauðsynlegt að senda yfirlýsinguna á þeirri stundu.

Vegna þess að vinur norska fjármálaráðherrans er íslenski fjármálaráðherrann og líka vegna þess að íslenski fjármálaráðherrann hefur sett hausinn á sjálfum sér að veði fyrir því að honum og vinkonu hans í forsætisráðuneytinu takist að troða Icesave ofan í kokið á þingmönnum og þjóðinni er þá ekki kominn tími til að spyrja:

Hvort það séu ekki íslenskir ráðherrar Samfylkingarinnar sem frá því í haust hafa staðið að baki því að norrænu lánin verði ekki veitt til Íslands nema áður sé búið að troða Icesave-nauðungarsamningunum ofan í kokið á þjóð og þingi?

Sambandið millið Icesave og ESB-þráhyggju Samfylkingarinnar ætti að vera orðið öllum ljóst!

Helga Garðarsdóttir