Attac mótmælir sölu á HS-orku til Magma Energy

Attac á Íslandi mótmælir harðlega hvernig íslensk stjórnvöld hyggjast fara á svig við anda laga um erlenda fjárfestingu og heimila kanadísku fyrirtæki að kaupa íslensk orkuver. Það kom berlega í ljós eftir hrunið á Íslandi hve allt regluverk og eftirlit um fjármálastarfsemi hérlendis var ábótavant og þjónaði fyrst og fremst örfáum einkaaðilum sem sölsuðu undir sig fjármálakerfi heillrar þjóðar, bjuggu til úr því sýndarpeninga í gjaldmiðlisbólum og víxilkaupum sín á milli og notuðu sem áhættufé á erlendum vettvangi. Ábyrg stjórnvöld reyna að læra af þessari reynslu og haga málum svo að ekki séu tekin öll bjargráð af þjóðinni og yfirráð yfir nýtingu á landinu.

Stjórnvöld sem núna höndla með þessi mál henda íslenskri þjóð úr öskunni á eldinn og svífast einskis til að afnema allt sem getur stöðvað að eignarhald og yfirráð á íslenskum auðlindum haldist hjá því fólki sem byggir landið. Stjórnvöld ganga meira segja svo langt að heimila fjármagnsfyrirtæki sem starfar utan Evrópska efnahagssvæðisins að kaupa hér orkuver þrátt fyrir skýr lagafyrirmæli þar um og þrátt fyrir að stjórnvöld viti mæta vel að fjármálafyrirtækið hefur fiffað til að fara á bak við lög sem Íslendingar hafa samþykkt. Með þessu er ennþá einu sinni farið á svig við lög og reglur til þess að búa til sem mest aðlaðandi umhverfi fyrir erlenda fjárfesta sem sveima um aflandseyjur og skattaparadísir.

http://attac.is/